Sino ang nagpapatibok sa puso ni Esperanza?

Sa huling linggo ng Innamorata, tila naguguluhan na si Esperanza sa nangyayari at sa kanyang tunay na nararamdaman para kina Dencio at Edwin. Sino sa dalawa ang mangingibabaw sa kanyang puso?

Patuloy pa rin ang pakikipagsundo ni Delia kay Alejandra kapalit ng kayamanan nito. Sunud-sunuran siya rito. Si Delia ang tumutulong para masakatuparan ang masasamang balak ni Alejandra laban kay Esperanza. Hanggang saan ang kayang gawin ni Delia para sundan ang mga nais ni Alejandra?

Nabawi ni Alejandra si Edwin kay Esperanza. Nangakong titigilan nito si Esperanza oras na magpakasal si Edwin sa kanya. Tuluyan niya na bang maaangkin ang puso ni Edwin?

Nasaktan si Dencio sa kinilos ni Esperanza dahil mukhang may pagtingin pa ito sa dating kasintahan. Napag-awayan nila ang tungkol dito. Nasaktan din si Esperanza sa naging reaksyon ni Dencio sa pagtulong niya kay Edwin. Pakiramdam ni Esperanza na walang tiwala si Dencio sa nararamdaman niya para rito.

Muntikan ng maaksidente si Esperanza pagkaalis sa bahay ni Dencio dahil sa kanilang naging away. Hindi matiis ni Dencio ang kasintahan. Sinundan niya ito at iniligtas. Nagkapatawaran ang dalawa dahil alam nilang may halaga sila para sa isa’t isa. Ngunit pinapili ni Dencio si Esperanza kung sino ang kanyang pipiliin sa kanila ni Edwin. Makakapagdesisyon na kaya si Esperanza?

Pinuntahan ni Esperanza si Edwin para pigilan ang kasal nito kay Alejandra. Bakit niya kaya ito ginawa? May pagtingin pa ba siya sa dating nobyo? Mapipigilan niya ba ang pagpapakasal nito?

Masayang-masaya si Alejandra sa araw ng kanyang kasal. Sa wakas, mapapasakanya na ang kanyang pinakamamahal na si Arnaldo (Edwin). Ngunit hindi niya alam na hahadlangan ni Esperanza ang kanyang kasal.

Ano ang gagawin niya oras na malamang hindi matutuloy ang kanyang kasal kay Arnaldo? Ano ang kanyang gagawin kay Esperanza kapag malaman nitong pipigilan ang kanyang kasal?

Huwag bibitiw sa paganda ng pagandang eksena ngayong linggo sa Innamorata pagkatapos ng The Half Sisters on GMA Afternoon Prime.